Chlausabend 4. Dezember 2004 im Hörnli Grabs

Als Kompensation für das fehlende Chlausgewand brachten die 2 "Chläuse" Ueli Zogg und Sepp Dudli jedem Chormitglied einen Vers dar:

Aemisegger Hans
Sit einiger Ziit isch bi de Probe en Platz leer
Im 2. Bass, döt fehlt er üs sehr.
Am Hans Aemisegger wünschet mir viel Muet und viel Chraft.
Und gueti Erholig, dass ers bald wieder zu üs id Probe schafft.

Aeschlimann Heinz
Vom Waro zum Coop, de Wechsel isch scho es Wiili perfekt
Und de Heinz Aeschlimann het viel Ziit id Umschuelig inegsteckt.
Das het ihn koschtet mänge freie Ooobed
Mer hoffed, jetzt heg ers denn gschafft, und wieder meh Ziit für Proobe.

Baumgartner Peter
Chum isch de Peter Baumgartner als FW-Kdt nüme im Amt,
scho het er übernoo en happige Nebejob für de Turnverband.
Mit so Lüüt im OK, do wird es Kreisturnfescht zum garantierte Erfolg
Und us em Feschtgwünn gits für de Männerchor en schöne Helfer-Sold.

Bicker Christian
Wenns d’Anni bim Iisinge mit immer no höchere, und no höchere Tön tuet probiere,
und die meischte Tenör müend kapituliere.
Eine hets, de singt, wie de Rebroff, mit glockeheller Stimm wiiter
Wer chönts au andersch si, es isch de Tenor Christian Bicker.

Bislin Robert
Er het sich nöd nu als Tenor hervorragend integriert,
und sich im Herbstfest als neue Chef für Spiele und Wettbewerbe präsentiert.
Bi de Durchfüerig vo de Saalwett zeigt er sich als wahres Moderatore-Ass.
De Röbi Bislin, fascht wie de Gottschalk, bim Wetten-Dass.

Eggenberger Heinrich und Mattheus
Zwei sehr sicheri Wert, im 1. Bass, und im 2. Tenor
Dass die zwei fehled, chunnt ganz selte vor.
Wer meini echt? Nöd die Söhne des Zebedäus
Sondern de Eggeberger Heiri und Matheus.

Eggenberger Peter
En zueverlässige Kamerad im Männerchor
Das isch au de Peter Eggenberger vom 2. Tenor.
Es Herbstfest ohne ihn, simmer ganz ehrlich
Wär sehr schwierig, denn als Bauchef isch er unentbehrlich.

Frick Hans
Wer schriibt d Sitzigsprotokoll so rasend schnell?
Chum isch mer dihei vo de Sitzig, isch s Protokoll scho uf em Mail
S isch de Hans Frick. De einzig chlii Lapsus wo em cha passiere
Isch dass er sich i de Johrzahl tuet verirre.

Grässli Paul
Todernschti Probe ohne en chline Gäg sind ihm ein Gräuel
Vo wem ich red? Denk vom Chämifeger Grässli Päul.
Doch wenn er mit sine Sprüch und Grimasse d Disziplin allzu arg strapaziert,
Wird er vo de Anni denn scho diszipliniert.

Gschwend Leo
Er chan jetzt alli Probe und Aaläss so richtig stressfrei gnüsse.
Sit er nümme mues nebst am Singe an administrative Krams tänke und alles wüsse.
Vor zwei Johr het er dörfe sini Lascht abgeh als Präsident,
und sich ohni Nervosität voll ufs Singe konzentriere, de Leo Gschwend.

Haltiner Ueli
Die tragendi Süüle im 2. Bass
Und au susch unentbehrlich für en Männerchor-Aalass
Wer verwandlet e nüechterni Halle in en Feschtsaal mit herbschtlicher Pracht
De Ueli Haltiner! Fantastisch, wiener das immer macht.

Hilty Andreas
Au er het höchst selte e Prob verpasst.
Uesers zueverlässigi Chormitglied Hilty Andreas
Rueh und Uusglicheheit, das zellt bi ihm vil.
Er weiss us Erfahrig, die haschtigste Autofahrer sind au nöd immer zerscht im Ziel.

Hollenstein Albert
En ganz sichere Wert im 2. Tenor
Wenn ich bineme Ton nöd sicher bi, so chan i ruhig ihm leie mis Ohr.
Und wenn de Chor brucht Tombolaprise us Holz, oder en Stuel mit 4 Bei,
au do hilft us de Patsche de Albert Holestei.

Letta Andri
Sit zwei Johr isch er Präsident, wo neui Idee tuet bringe
Im Früehlig es Früehligskonzert, oder vor de Wienacht es Adventsfenstersinge.
Doch s chürzescht Konzert, het de Andri Letta a de letzte HV organisiert,
zom sin vergessne Johresbricht chöne hei go hole, het er üs singe lo es 3-minütigs Ueberbrückigslied.

Markus Lippuner
Bruchsch en Choch fürs Sänger- oder Herbstfescht
De Markus Lippuner, de isch einfach de Bescht.
Sogar wenns s Chuchizelt verbloset imene heftige Gwitter
Scho e Viertel Stund spöter chochet er wieder seeleruhig witer.

Nigg Walter
De Walter Nigg im 1. Tenor blibt die Ruhe selber
Au wenn sich anderi i sinner Nöchi öppe benämed wie Chälber.
Und wie sind mir alli im Herbstfescht froh
Wenn mer, wenns schiffet und regnet, chönd i sini Halle goh.

Tanno Georg
Als neus Mitglied, wie simmer froh,
Hend mer vor emene Johr chöne begrüesse de Georg Tannò
Und au fürs Herbstfest gilt, ihr liebe Lüt:
Ohni Strom - und ohni Installlatione vom Georg - got nüt!

Vetsch Hansruedi
Mer stelli sich vor, e Prob ohne Hansruedi Vetsch
So ohni Noteblätter wör keine me singe, und alli miechet en Lätsch
Und bi jedem Aalass und Uftritt, wie chönts au andersch si
Isch di fixfertig apassti Liedermappe dank em Hansruedi debi.

Vetsch Christian und Werner
Als Lehrer sind beidi musikalisch kompetent
Und d’Anni cha öppe en Rot bi ihne hole, wenns irgendwo chlemmt.
Eine vo beidne isch Spezialischt, wenn emol en Ansäger oder Conférencier wötsch
Es sind de Werner und de Christian Vetsch.

Anni Forrer
D’Anni Forrer leitet üse Chor mit Umsicht und Kompetenz
Und chan sich, wenns nötig isch, au duresetze mit Vehemenz.
S’Obigprogramm vom Herbstfest - Musikwahl, Text dichte, Ablauf und Bekleidig - het ihre viel Lob beschert.
Alli ihri Arbed für üs isch au hüt abig en chräftige Applaus wert.

Frauen
Genug des Lobes für üsi Männerchor-Manne.
Damit überhaupt es Herbstfest cha stattfinde, müend no viel meh Lüt ane.
Üsi Fraue unterstützed üs stark, do chömmer üs ja no gratuliere,
und hüt obig als Dank au ihne chräftig applaudiere.

Schlusswort
So, das wärs gsi, ihr liebe Lüt.
Üse Uftritt isch fertig, und alli Gschenkli verteilt für hüt.
Entschuldiget di holprige Vers und s’fählend Chleid vom Samichlaus.
Nobody is perfect! – Mer sind trotzdem dankbar für euen Applaus.